軟綿綿食起來有啲似慕絲，但又有蛋糕嘅蛋香味，用咗唔重嘅芝士，所以感覺唔會太膩，真係令人好難抗拒，會食完一件又一件呀！
材料（6吋）
雞蛋3隻，忌廉芝士125g，粟米粉20g，牛奶50ml，無鹽牛油30g，糖霜45g
做法
- 將忌廉芝士放係小盤，用另一個大盤放熱水，隔熱水座溶芝士，拌入牛奶，搞勻至滑身。
- 再加入牛油，將牛油搞勻至溶化和均勻。
- 攞走熱水，將蛋白和蛋黃分開，將蛋黃慢慢加入去芝士裡搞勻。
- 篩入粟米粉，搞勻至滑身，備用。
- 蛋白和糖霜混合，用打蛋器打至8成凝固，蛋白表面會有波浪紋。
- 預熱焗爐200度。
- 分4-5次將蛋白加入到芝士漿，每次都用刮刀慢慢從下到上咁拌勻。
- 蛋糕模放上牛油紙，係模底包上錫紙，確保啲水唔好走入蛋糕中，然後倒蛋糕漿入模。
- 焗爐底部放盤熱水，再座蛋糕入去，先用180度焗30分鐘，再用150度焗30分鐘，如果表面還未變金黃色，就放上層焗多3分鐘，關爐後唔需要攞蛋糕出來，照放入面30分鐘先攞出來。
- 待涼後，放入雪櫃雪一晚先食，口感更好 ^^
其他貼士
**記住加入蛋白時要慢慢輕手加入，如果太大力會令蛋白氣泡消失。
**用座熱水焗嘅方法，會令蛋糕質地好細密。
其他食譜：蒜香牛油雞翼
